Զելենսկին գնահատական է տվել Վատիկանում Թրամփի հետ բանակցություններին

Ուկրաինայի առաջնորդ Վլադիմիր Զելենսկին Վատիկանում ԱՄՆ նախագահ Դոնալդ Թրամփի հետ բանակցությունները անվանել է երկու քաղաքական գործիչների միջև երբևէ ունեցած լավագույն հանդիպումը։ Այս մասին հաղորդում է Reuters-ը։

Պետության ղեկավարի խոսքով՝ քննարկման հիմնական թեմաներն էին հակամարտության կարգավորումը և հակառուսական պատժամիջոցները։ Զրույցի ընթացքում Թրամփը համաձայնել է, որ 30-օրյա հրադադարի սահմանումը կլինի Մոսկվայի և Կիևի միջև առճակատմանը վերջ դնելու ճիշտ առաջին քայլը։

Նա նաև ասել է, որ ԱՄՆ նախագահը «շատ ուժեղ» արձագանք է ցուցաբերել հակառուսական պատժամիջոցների հարցին։ Միևնույն ժամանակ, Ուկրաինայի առաջնորդը չի մանրամասնել, թե կոնկրետ ինչ է քննարկվել։

Հիշեցնենք` ապրիլի 26-ին Վատիկանում տեղի է ունեցել Հռոմի պապ Ֆրանցիսկոսի հրաժեշտի արարողությունը, որին մասնակցել են տասնյակ երկրների առաջնորդներ։ Զելենսկին և Թրամփը նույնպես մասնակցել են սգո միջոցառմանը՝ դրանից առաջ կարճատև հանդիպում ունենալով։ Ե՛վ Կիևը, և՛ Վաշինգտոնը դրական են գնահատել բանակցությունները։