Զելենսկին կեղծավոր խաղ խաղաց․ Վլադիմիր Ռոգով
Ռուսաստանի Դաշնության Հանրային պալատի ինքնիշխանության հարցերով հանձնաժողովի նախագահ Վլադիմիր Ռոգովը կեղծավոր խաղ է անվանել Վլադիմիր Զելենսկու առաջարկը՝ երկարացնելու զատկական զինադադարը հեռահար հրթիռներով հարվածների մորատորիումի մասով, գրում է «Ռիա Նովոստի»-ն։
«Զելենսկու կողմից մենք տեսնում ենք կեղծավոր խաղ, որ նա, իբր, պատրաստ է խաղաղության և ձգտում է խաղաղության։ Բայց իրականում սա փորձ է ժամանակ շահել բռնի մոբիլիզացիայի համար, որպեսզի 30 օրվա ընթացքում ավելի շատ մարդկանց բռնի և նոր ուժով տանեն սպանդի։ Գումարած վերազինում ստանալ, առաջին հերթին, արևմտաեվրոպական երկրներից»,- ասել է Ռոգովը։
Ավելի վաղ Արտաքին գործերի պաշտոնական ներկայացուցիչ Մարիա Զախարովան հայտարարել էր, որ Կիևի իշխանությունները չեն պահպանել հրադադարի ռեժիմը Զատիկին։ Նրա խոսքով՝ հարվածների համար օգտագործել են ամերիկյան HIMARS հրթիռները:
Իր հերթին Վլադիմիր Զելենսկին իր Telegram ալիքում առաջարկել է հրաժարվել հեռահար անօդաչու թռչող սարքերով և հրթիռներով քաղաքացիական ենթակառուցվածքներին հարվածելուց առնվազն 30 օր ժամկետով՝ երկարաձգման հնարավորությամբ։
