Հայտնի է Շիրակի ողբերգական վթարի գործով դատավճիռը

Փաստաբան Հայարփի Սարգսյանը տեղեկացնում է, որ ապրիլի 10-ին՝ ժամը 16:15-ին, Շիրակի մարզի առաջին ատյանի ընդհանուր իրավասության դատարանում, դատավոր Ա. Գեղամյանի նախագահությամբ, հրապարակվել է 2024 թվականի հուլիսի 26-ին տեղի ունեցած ողբերգական ավտովթարի գործով դատավճռի եզրափակիչ մասը։

Ըստ Սարգսյանի, ով հանդիսանում է տուժողների լիազոր ներկայացուցիչը, դատարանը մեղավոր է ճանաչել Արմեն Տոնոյանին և նրան դատապարտել 5 տարի 6 ամիս ազատազրկման։ Բացի հիմնական պատժից, նա նաև 3 տարով զրկվել է վարորդական իրավունքից։ Մյուս մեղադրյալը՝ Արման Ալեքսանյանը, ևս ճանաչվել է մեղավոր և դատապարտվել է 750,000 դրամ վարչական տուգանքի։

Դատարանը մասնակիորեն բավարարել է տուժողների գույքային պահանջները՝ համապատասխանաբար 4 միլիոն և 2 միլիոն ՀՀ դրամի չափով։

Նշենք, որ նախորդ դատական նիստի ընթացքում մեղադրյալները լիովին ընդունել էին իրենց մեղքը, ինչի արդյունքում գործով ընտրվել էր արագացված դատաքննության ընթացակարգ, և նշանակվել էին լրացուցիչ դատական լսումներ։