ՆԱՏՕ-ն կշարունակի Ռուսաստանին դիտարկել որպես երկարաժամկետ սպառնալիք. Ռյուտե

ՆԱՏՕ-ն, նույնիսկ ուկրաինական հակամարտության ավարտից հետո, կշարունակի Ռուսաստանը երկարաժամկետ սպառնալիք համարել։ Այս մասին, ՏԱՍՍ-ի փոխանցմամբ, ՆԱՏՕ-ի արտգործնախարարների հանդիպումից հետո կայացած մամուլի ասուլիսում հայտարարել է դաշինքի գլխավոր քարտուղար Մարկ Ռյուտեն։

«Եկեք միամիտ չլինենք, ՆԱՏՕ-ն կշարունակի Ռուսաստանին դիտարկել որպես երկարաժամկետ սպառնալիք նույնիսկ ուկրաինական պատերազմի ավարտից հետո»,- ասել է նա։

Ռյուտեն հավելել է, որ հյուսիսատլանտյան դաշինքը կշարունակի ռազմական աջակցություն ցուցաբերել Կիևին Վիսբադենում իր հրամանատարության միջոցով, որը համակարգում է ռազմական մատակարարումները, ինչպես նաև Ուկրաինայում իր ներկայացուցչության միջոցով:

«ՆԱՏՕ-ն կշարունակի աջակցել Ուկրաինային Վիսբադենի հրամանատարության և Ուկրաինայում մեր ներկայացուցչության միջոցով: ՆԱՏՕ-ն պատրաստ է աջակցել Ուկրաինային, որպեսզի նա կարողանա շարունակել պայքարը», - ասել է նա:

Գլխավոր քարտուղարն աջակցել է հրադադարի շուրջ համաձայնության գալու ԱՄՆ-ի փորձերին, բայց նաև ողջունել է ՆԱՏՕ-ի եվրոպական երկրների կողմից Ուկրաինա զորքեր ուղարկելու հնարավորության վերաբերյալ քննարկումները: Ռյուտեն ընդգծել է, որ հակամարտության ավարտից հետո ՆԱՏՕ-ն մտադիր է զինել Ուկրաինային, որպեսզի «Ռուսաստանն այլևս չկարողանա ձեռք բերել ոչ մի քառակուսի կիլոմետր տարածք»։