Պուտինը ստուգում է Թրամփին
Ռուսաստանի նախագահ Վլադիմիր Պուտինը ստուգում է, թե ինչ կարելի է ձեռք բերել ԱՄՆ նախագահ Դոնալդ Թրամփի հետ Ռուսաստանի դեմ սահմանված պատժամիջոցների թուլացման հարցում, մարտի 28-ին հայտնում է Bloomberg-ը՝ հղում անելով աղբյուրներին։
Գործակալության աղբյուրները հայտնել են, որ Կրեմլի «մտածված ռազմավարության» մի մասն է կազմում Ռոսսելխոզբանկը SWIFT միջազգային բանկային համակարգին միացնելու պահանջը, որը վերահսկվում է Եվրամիության կողմից։ Ռուսաստանը այս պայմանն առաջ քաշեց Սեւ ծովում հրադադարի շուրջ բանակցությունների շրջանակներում։
Bloomberg-ի աղբյուրների համաձայն՝ Ռոսսելխոզբանկն ընտրվել է՝ ստուգելու համար, թե արդյոք Թրամփը կկարողանա Եվրոպային ներգրավել դրան։
«SWIFT-ի հետ կապված հաջողությունը կարող է հանգեցնել ամբողջ պատժամիջոցների ռեժիմի աստիճանական թուլացմանը»,- գրում է գործակալությունը՝ հղում անելով աղբյուրներին։
Ռուսաստանի և ԱՄՆ-ի բանակցությունների երկրորդ փուլից հետո, որը տեղի ունեցավ մարտի 25-ին Էր Ռիադում, Կրեմլը մի շարք պայմաններ է առաջադրել Սև ծովում կրակը դադարեցնելու համար, որն առաջարկել էր ամերիկյան պատվիրակությունը։ Դրանք ներառում էին «Ռոսսելխոզբանկի» և «պարենամթերքի և պարարտանյութերի միջազգային առևտրով զբաղվող այլ ֆինանսական կազմակերպությունների» դեմ պատժամիջոցների վերացումը: ԱՄՆ պետքարտուղար Մարկո Ռուբիոն ասել է, որ ԱՄՆ-ը մտադիր է այդ հարցը քննարկել ինչպես Ռուսաստանի, այնպես էլ Եվրամիության հետ։ Եվրոպացի պաշտոնյաները հրաժարվել են մեղմացնել Ռուսաստանի դեմ պատժամիջոցները։
