Եվրամիությունը չի առգրավի ռուսական սառեցված ակտիվները

Եվրամիությունը դադարեցրել է ռուսական սառեցված ակտիվների հնարավոր բռնագրավման քննարկումը։ Այս մասին գրում է Deutsche Welle-ն՝ հղում անելով ԵՄ մարտի 20-ի գագաթնաժողովի եզրակացությունների տեքստին, որը ձեռք է բերել խմբագրությունը։

«Եվրամիության օրենսդրության համաձայն՝ ռուսական ակտիվները պետք է անշարժ մնան այնքան ժամանակ, մինչև Ռուսաստանը չավարտի իր ագրեսիվ պատերազմն Ուկրաինայի դեմ և փոխհատուցի նրան այս պատերազմի պատճառած վնասը», - ասվում է տեքստում։

 Ինչպես գագաթնաժողովի նախօրեին հրատարակությանն ասել է եվրոպացի դիվանագետներից մեկը, Եվրոպան մտածում է ապագա հրադադարի և խաղաղ բանակցությունների մասին, և «մարդիկ սկսում են հասկանալ, որ այդ ակտիվներն ունենալը կարող է ավելի կարևոր լինել, քան բռնագրավելը՝ առանց իմանալու, թե ինչ անել դրանց հետ»: