Ադրբեջանը ժամանակը ճիշտ օգտագործեց․ Անդրանիկ Քոչարյան

Ադրբեջանի նման պահվածքը նորություն չէ, նրանք ցանկանում են լարվածության օջախ ստեղծել Հայաստանում և դա նրանց հաջողվում է։ Այս մասին ճեպազրույցում ասել է ՔՊ պատգամավոր Անդրանիկ Քոչարյանը։

«Մենք հետևում ենք սահմանային իրավիճակին, և եթե վտանգ տեսնենք՝ ըստ անհրաժեշտության մեր զինված ուժերը իրենց իրավասությունների սահմանում  համապատասխան քայլեր կձեռնարկեն։ Ադրբեջանը հայտարարեց, որ խնդիր չունի այդ պայմանագրի հետ կապված, մենք հայտարարել ենք, որ կստորագրենք, արձագանքել են տարբեր միջազգային կառույցներ և երկրներ՝ ողջունելով  այդ քայլը։ Տարածաշրջանի խաղաղությունը պետք է ամրագրվի փաստաթղթով, որպեսզի սկսենք դա իրականության մեջ կառուցել»,- ասաց պատգամավորը։

Քոչարյանը նշեց նաև, որ Ադրբեջանը ժամանակը ճիշտ օգտագործեց, կառուցեց այն համակարգը ու հասավ նրան ինչին ուզում էր․

«Մենք ի տարբերություն Ադրբեջանի 1994 թվականի հրադադարից հետո, ունենալով մի շարք առավելություններ մեր հաղթանակները ստորադասեցինք, անձնական հարցերի պատճառով, և դա արձանագրվեց պատերազմի ելքերով, մենք թե քառօրյա, թե 44-օրյա պատերազմների ժամանակ պարտվել ենք։ Կռիվ անելը հեշտ է խաղաղության հասնելն է դժվար»,- հավելեց պատգամավորը։