Մանրամասներ լրագրողի` քաղաքացուն հարվածելու դեպքի մասին

Օրերս «Թիվի 5» հեռուստաընկերության լրագրողն ու օպերատորը հարցազրույց չտալու համար վիճել են քաղաքացու հետ ու նրան վնասվածքներ պատճառել։ Այս մասին հայտնել է «Հայկական ժամանակ»-ը հղում անելով ՆԳՆ-ին:

«Մարտի 13-ին՝ ժամը 15.35-ին, ՆԳՆ ոստիկանության օպերատիվ կառավարման կենտրոն հիվանդանոցից հաղորդում է ստացվել, որ Կոմիտասի պողոտայում գտնվող սուպերմարկետի մոտից շտապօգնության խումբը «գլխի պատռած վերք» ախտորոշմամբ բուժօգնության է տեղափոխել 55-ամյա տղամարդու»,- գրել է թերթը:

«5-րդ ալիքի» ղեկավարությունից Auroranews-ին ասացին, որ հրապարակման մեջ լրագրողին վերագրվում է արարք, որը նա չի կատարել: 

«Երիտասարդ լրագրողուհին ոչ մեկին չի հարվածել: Մեր կադրերում ֆիքսված  է, որ քաղաքացու՝ իրեն չնկարահանելու՝ վիրավորական տոնով  պահանջից անմիջապես հետո տեսախցիկն անջատվել է, սակայն ագրեսիվ տրամադրված քաղաքացին սկսել է անձնական բնույթի, շատ կոպիտ վիրավորանքներ տեղալ նկարահանող խմբի երկու անդամների հասցեին: Դեպքի վայրում եղած մեր աշխատակիցները կատարվածը համարում են կանխամտածված  սադրանք, որից պաշտպանվել, ցավոք, չի հաջողվել: «ՀԺ»-ի հրապարակումից տեղեկանում ենք, որ «կազմված փաստաթղթերը ներկայացվել են նախաքննական մարմին»: Մեր իրավաբանները զբաղվում են այս հարցով, և հույս ունենք՝ քննությունը կտա բոլոր հարցերի պատասխանը»,-ասացին հեռուստաընկերությունից: