Էսկալացիայով կպատասխանենք էսկալացիային. հուսիները կհարվածեն ԱՄՆ-ի ռազմաբազաներին. ԶԼՄ

Եմենի տարածքում ԱՄՆ-ի ավիահարվածներն անպատասխան չեն մնա, Եմենի «Անսար Ալլա» (հուսիներ) շարժման ուժերը լիովին պատրաստ են էսկալացիայով պատասխանել էսկալացիային, հայտարարել է հուսիների քաղբյուրոն: Հայտարարությունը հրապարակել է Al Masirah հեռուստաալիքը։

«Ագրեսիան անպատասխան չի մնա։ Եմենի մեր զինված ուժերը պատրաստ են էսկալացիային դիմակայել էսկալացիայով», - ասվում է քաղբյուրոյի հայտարարության մեջ։

Ավելի վաղ Al Hadath հեռուստաալիքը հայտնել էր, որ հուսիների դիրքերը Սանայում ենթարկվել են զանգվածային հրթիռային հարվածների։ ԱՄՆ նախագահ Դոնալդ Թրամփը հայտարարել է, որ հրաման է տվել ամերիկացի զինվորականներին «վճռական և հզոր» գործողություններ սկսել հուսիների դեմ: Հուսիների կառավարության առողջապահության նախարարության տվյալներով՝ Սանայի ուղղությամբ ԱՄՆ-ի ավիահարվածների հետևանքով կան զոհեր ու վիրավորներ:

Եմենի հյուսիսում իշխող «Անսար Ալլա» (հուսիներ) ռազմաքաղաքական շարժումը կարող է հարվածներ հասցնել ԱՄԷ-ում կամ Ջիբութիում ԱՄՆ-ի ռազմակայաններին՝ ի պատասխան Եմենում սկսված ամերիկյան ռազմական գործողության: Այս մասին Washington Post-ին հայտնել է եմենցի վերլուծաբան Մոհամեդ ալ Բաշան:

«Ալ-Բաշան զգուշացրել է, որ հուսիները կարող են փորձել հարվածներ հասցնել ԱՄԷ - ում կամ Ջիբութիում գտնվող ամերիկյան բազաներին՝ որպես հատուցում», - գրում է թերթը:

Ներկայում ԱՄՆ-ի ռազմական ավիացիայի հարվածները Եմենի տարածքին շարունակվում են։ Գրոհները կրկին իրականացվում են Հյուսիսային Սաադա նահանգի վրա, որը համարվում է հուսիների հենակետը, ինչպես նաև հարվածներ են հասցվել երկրի հյուսիս-արևելքում գտնվող Մաարիբ նահանգին, որը մասամբ գտնվում է Եմենի միջազգային ճանաչված կառավարության վերահսկողության տակ: