Նորվեգական նավթային ընկերությունը հրաժարվել է վառելիք մատակարարել ԱՄՆ բանակին

Նորվեգական Haltbakk Bunkers նավթային ընկերությունը հրաժարվել է վառելիք տրամադրել Նորվեգիայում տեղակայված ամերիկացի զինծառայողներին, հաղորդում Է Daily Express-ը: Մատակարարումները դադարեցվել են ԱՄՆ նախագահ Դոնալդ Թրամփի և Ուկրաինայի նախագահ Վլադիմիր Զելենսկու վեճից հետո:

«Մենք որոշել ենք անհապաղ դադարեցնել Նորվեգիայում ամերիկյան զորքերին և նրանց նավերին վառելիք մատակարարելը, որոնք մտնում են նորվեգական նավահանգիստներ: Ոչ մի լիտր վառելիք ամերիկացիներին։ Մենք կոչ ենք անում բոլոր նորվեգացիներին և եվրոպացիներին հետևել մեր օրինակին»,-հայտարարել է ընկերությունը։

Նորվեգական նավթային ընկերության հայտարարության մեջ նաև ասվում է, որ իրենք ականատես են եղել Ամերիկայի ներկայիս նախագահի և նրա փոխնախագահի կողմից ուղիղ եթերում ներկայացված ամենամեծ խայտառակությանը: 

Հիշեցնենք, որ փետրվարի 28-ին Դոնալդ Թրամփի և Վլադիմիր Զելենսկու հանդիպումն ավարտվել է վիճաբանությամբ, որի պատճառով չեղարկվել է օգտակար հանածոների գործարքը: Սպիտակ տունն ավելի ուշ հանդես է եկել Ուկրաինայի նախագահի հետ շփումները դադարեցնելու օգտին: