Ուղևորատար ինքնաթիռը շրջվել է Տորոնտոյում վայրէջք կատարելիս

Տորոնտոյի Լեսթեր Փիրսոն միջազգային օդանավակայանում վայրէջք կատարելիս Delta Airlines ավիաընկերության ինքնաթիռը վթարի է ենթարկվել։ Այս մասին հայտնում է կանադական CTV News հեռուստաընկերությունը։

Globe and Mail–ի փոխանցմամբ՝ ավիավթարի պահին օդանավակայանում եղանակային պայմանները բարդ են եղել՝ -9 ջերմաստիճան, բուք և քամու ուժգնացում մինչև 18 մ/վրկ։

Սոցցանցերում հրապարակված լուսանկարներում երևում է, որ ինքնաթիռը շրջվել է:


ԶԼՄ–ների վերջին տվյալներով՝ տուժել է 18 մարդ, այդ թվում՝ մեկ երեխա։ Նա և երկու մեծահասակ ծանր վիճակում հոսպիտալացվել են:

CTV News-ն ավելի վաղ հայտնել էր 8 տուժածի մասին, որոնց վիճակի մասին մանրամասներ չէին նշվում: 

Նախնական տվյալներով՝ ինքնաթիռում եղել է 80 մարդ։

Միջադեպի մասին տեղեկությունը հաստատել են օդանավակայանում։

«Toronto Pearson–ը տեղյակ է Մինեապոլիսից ժամանած Delta Airlines ավիաընկերության ինքնաթիռի վայրէջքի ժամանակ տեղի ունեցած միջադեպի մասին։ Դեպքի վայր են ուղարկվել շտապօգնության խմբեր»,- ասվում է օդանավակայանի հաղորդագրության մեջ։