Հեշտ չի լինի. Մարկո Ռուբիոն` բանակցությունների մասին

ԱՄՆ պետքարտուղար Մարկո Ռուբիոն ասել է, որ Ուկրաինայի բանակցային գործընթացի ապագան որոշվելու է կողմերի «խոստումները կատարելու» պատրաստակամությամբ։ Այս մասին հայտնում է RIA Novosti-ն։

Ըստ նրա՝ դա ցույց կտան առաջիկա շաբաթները։

Ռուբիոն նաև, ինչպես նշում է «Ինտերֆաքսը», հայտարարել է, որ ուկրաինական հակամարտության լուծումը հեշտ չի լինի, և կողմերը ստիպված կլինեն գնալ զիջումների։

Փետրվարի 18-ին Սաուդյան Արաբիայի մայրաքաղաքում կայացած Ռուսաստան-ԱՄՆ հանդիպումը նվիրված էր մի շարք տնտեսական նախագծերում համագործակցության վերականգնմանը, ինչպես նաև ուկրաինական կարգավորման շուրջ հնարավոր շփումների նախապատրաստմանը և երկու երկրների ղեկավարների հանդիպումների կազմակերպմանը։

Ռուսաստանի Դաշնությունը բանակցությունների սեղանի շուրջ ներկայացնում էին արտգործնախարար Սերգեյ Լավրովը և նախագահի օգնական Յուրի Ուշակովը, իսկ Միացյալ Նահանգները՝ Ազգային անվտանգության հարցերով խորհրդական Մայք Վալցը, պետքարտուղար Մարկո Ռուբիոն և Մերձավոր Արևելքի հարցերով ԱՄՆ առաջնորդի հատուկ բանագնաց Սթիվեն Վիտկովը։