Հայաստանը հրաժարվում է խորհրդային զենքերից և ձեռք է բերում նոր հրետանային համակարգեր. Janes

Հայաստանն սկսել է ֆրանս-հնդկական արտադրության Trajan 155 մմ քարշակային հաուբիցների խմբաքանակի գնման գործընթացը, հայտնում է Janes-ը։

Նշվում է, որ խոսքը հայկական կողմից նման տեսակի հրետանային համակարգերի «անհայտ քանակի» ձեռքբերման մասին է։ Trajan-ը մշակվել է ֆրանսիական Nexter Systems ընկերության կողմից։ Ըստ լրատվամիջոցի՝ ստանդարտ զինամթերք արձակելիս համակարգի հեռահարությունը մոտավորապես 30 կմ է, իսկ ակտիվ-ռեակտիվ հրետանային արկերի կիրառման դեպքում այդ ցուցանիշը հասնում է 55 կմ-ի։

Հրապարակման համաձայն՝ Հայաստանի կողմից այդ հրետանային համակարգերի գնումը ցույց է տալիս Երևանի ռազմավարական որոշումը՝ հրաժարվել խորհրդային զենքերից և զինամթերքից, քանի որ երկիրն արդեն գնում է 155 մմ տրամաչափի հրետանային համակարգերի մի քանի տեսակ։ Հրապարակումը նկատել է Ռազմավարությունների և տեխնոլոգիաների վերլուծության ռուսական կենտրոնի Telegram ալիքը, ըստ որի Հայաստանը լինելու է Trajan-ի առաջին հայտնի հաճախորդը։ Ալիքը նշել է, որ Հայաստանի համար Trajan համակարգերը նախատեսվում է արտադրել Հնդկաստանում՝ Larsen & Toubro (L&T) խմբի կողմից, որը նախապես պայմանագիր էր կնքել Nexter-ի հետ համատեղ Trajan արտադրելու մասին՝ փորձելով այն առաջարկել հնդկական բանակին։

2024-ի փետրվարի 2-ին ՀՀ պաշտպանության նախարար Սուրեն Պապիկյանը զենքի մատակարարման ոլորտում Հնդկաստանին և Ֆրանսիային Հայաստանի հիմնական գործընկերներից էր համարել։ Հնդկաստանի պաշտպանության նախարարության տվյալներով՝ 2024-2025թթ․ ֆինանսական տարվա սկզբին Հնդկաստանից Հայաստան սպառազինության ընդհանուր ներմուծումը հասել էր 600 միլիոն դոլարի։