Փարիզում ցույցի ժամանակ պատռել են ԵՄ–ի դրոշը

Եվրամիությունից Ֆրանսիայի դուրս գալու կոչով հանդես եկող ցուցարարները Փարիզում պատռել են Միության դրոշը: Այս մասին հայտնում է ТАСС–ը՝ նշելով, որ ցույցը անցկացվում է Փարիզի կենտրոնում՝ Սեն Դոմինիկ փողոցում։

«2025 թվականը պետք է լինի այն տարին, երբ Ֆրանսիան վերջնականապես դուրս կգա Եվրամիությունից և ՆԱՏՕ-ից, քանի որ երկիրն այս կազմակերպությունների հետ ճանապարհ չունի», – ասել է «Հայրենասերներ» կուսակցության առաջնորդ Ֆլորիան Ֆիլիպոտը՝ ելույթ ունենալով ցույցի ժամանակ:

Նրա կարծիքով՝ ԵՄ անդամակցությունը վնասակար է դրա մաս կազմող յուրաքանչյուր երկրի համար։ Քաղաքական գործիչը մատնանշել է Ռումինիան, որտեղ Սահմանադրական դատարանը դեկտեմբերի 6-ին չեղյալ հայտարարեց նախագահական ընտրությունների արդյունքները։

«Այսօր ԵՄ-ը չեղյալ է հայտարարում նախագահական ընտրությունները, երբ դա իրեն դուր չի գալիս, այսպես կոչված, ռուսական միջամտության պատրվակով, միևնույն ժամանակ, ոչ ոք չի նկատում ԱՄՆ-ի և Եվրամիության իրական միջամտությունը այլ պետությունների գործերում»,– ասել է նա։