Թուրքիայի ընկերությունները մեծացրել են զենքի մատակարարումները ՀՀ
Ռուսաստանը, չնայած Եվրամիության էմբարգոյին, որը սահմանվել է դեռ 2014 թվականից, հարևան երկրների միջոցով ստանում է արևմտյան ընկերությունների արտադրության հազարավոր դիպուկահար հրացաններ և միլիոնավոր պարկուճներ: Այս մասին հայտնում է The Insider-ը՝ չեխական Investigace.cz-ի, իտալական IrpiMedia-ի և ղազախական Vlast.kz-ի հետ համատեղ հետաքննության արդյունքում:
Լրագրողները պարզել են, որ վերջին տարիներին Եվրամիության, ԱՄՆ-ի և Թուրքիայի ընկերությունները մեծացրել են զենքի մատակարարումները Հայաստան, Վրաստան, Ղազախստան, Ղրղըզստան և Ուզբեկստան։
«Հայաստան, Վրաստան, Ղազախստան և Ղրղըզստան արտահանումը երեք տարվա ընթացքում աճել է երկուսուկես անգամ՝ 2020 թվականի՝ մոտ 20 հազար հրացանափողից հասնելով 53 հազարի՝ 2023 թվականին», - ասվում է հրապարակման մեջ։
Հետաքննությունը նշում է նաև, որ Իտալիայից Հայաստան դիպուկահար հրացանների և այլ զենքի արտահանումը չորս տարվա ընթացքում աճել է գրեթե 30 անգամ՝ 2019-ին 68 միավոր զենքից հասնելով 1862-ի՝ 2023-ին։
Հայաստանի պաշտպանության նախարարությունը չի մեկնաբանում ռազմական գնումները։
Ըստ լրատվամիջոցի՝ Ղրղըզստանը 2020 և 2021 թվականներին Իտալիայից զենք ընդհանրապես չի գնել, 2022 թվականին ստացել է 882 միավոր զենք, իսկ 2023 թվականին՝ 4 հազար 434:
Թուրքիայից Վրաստան զենքի արտահանումը 2019 թվականին ավելի քան 8 հազար միավորից 2023 թվականին հասել է գրեթե 19 հազարի։ Բացի այդ, լատվամիջոցը նշում է, որ ռուս դիպուկահարները շարունակում են ռուսական զենքի փոխարեն օգտագործել արևմտյան հրացաններ ու պարկուճներ։ Դա հաստատում են նաև դիպուկահարների մրցումների տեսագրությունները։
