Երբ կվերականգնվի Դամասկոսի միջազգային օդանավակայանը
Դամասկոսի միջազգային օդանավակայանը մի քանի օրից կվերսկսի աշխատանքը։ Այս մասին քաթարական Al Jazeera հեռուստաալիքին հայտնել է սիրիական ընդդիմության քաղաքական վարչակազմի աղբյուրը, որն անցած շաբաթվա վերջին վերահսկողություն է հաստատել Դամասկոսի և երկրի բազմաթիվ այլ քաղաքների վրա։
«Միջազգային օդանավակայանը կգործի մի քանի օրից: Մաքրման և կազմակերպման աշխատանքները սկսվել են այսօր»,- ասել է հեռուստաալիքի աղբյուրը։
Նշենք, որ դեկտեմբերի 8-ի վաղ առավոտից Դամասկոսի միջազգային օդանավակայանը դադարեցրել է թռիչքներ ընդունելն ու ուղարկելը, իսկ բոլոր աշխատակիցները տարհանվել են օդային նավահանգստից:
Հիշեցնենք, որ նոյեմբերի 27-ին զինված ընդդիմադիր խմբավորումները լայնածավալ հարձակում են սկսել սիրիական բանակի դիրքերի ուղղությամբ` Հալեպ և Իդլիբ նահանգներում։ Դեկտեմբերի 7-ի երեկոյան նրանք գրավեցին մի քանի խոշոր քաղաքներ (Հալեպ, Համա, Դարաա և Հոմս), իսկ դեկտեմբերի 8-ին մտան Դամասկոս։ Սիրիայի կառավարական ստորաբաժանումներն էլ լքել են քաղաքը։
