Կստուգվեն նաև շարքային քաղաքացիների բանկային հաշիվները. նախագիծ

ՀՀ պետական եկամուտների կոմիտեն կստուգի ոչ միայն բիզնեսի, այլև շարքային քաղաքացիների բանկային հաշիվները։ «Հարկային օրենսգրքում» համապատասխան փոփոխությունների նախագիծն այսօր հավանության արժանացավ ՀՀ կառավարության նիստի ժամանակ:

Օրենսդրական փոփոխությունների անհրաժեշտությունն առաջացել է` ելնելով այն հանգամանքից, որ ֆիզիկական անձանց համար փուլ առ փուլ ներդրվում է հարկային հայտարարագրերի պարտադիր ներկայացման համակարգ։ Հայտարարագրերը ստուգելու համար ՊԵԿ–ը քաղաքացիներից քաղվածքներ է պահանջելու իրենց բանկային հաշիվների մասին։

Ֆիզիկական անձինք այդ քաղվածքները պետք է ներկայացնեն 3 աշխատանքային օրվա ընթացքում:

Բացի այդ, ըստ ընդունված փոփոխությունների` կորոշվի, թե որ դեպքերում կոմիտեն կանցկացնի ֆիզիկական անձանց եկամուտների խոր ստուգում։ Մասնավորապես դա վերաբերում է բանկային հաշվի քաղվածքի և հայտարարագրի միջև անհամապատասխանությունների հայտնաբերման դեպքերին։

«Հարկային օրենսգրքում» համապատասխան փոփոխությունների նախագիծը ներկայացվեց Ազգային ժողովի քննարկմանը։