Իրադրությունն ավելի է լարվում․ Գրոսսի

Ատոմային Էներգիայի միջազգային գործակալության (ՄԱԳԱՏԷ) ղեկավար Ռաֆայել Գրոսսին հայտարարել է իրանական միջուկային ծրագրի շուրջ իրադրության դիվանագիտական կարգավորման ուղիներ գտնելու անհրաժեշտության մասին՝ Թեհրան կատարելիք այցի նախաշեմին:

«Իրանի իշխանությունները պետք է հասկանան, որ միջազգային իրադրությունն ավելի է լարվում, որ մանեւրելու տարածքը սկսում է կրճատվել, եւ որ անհրաժեշտ է դիվանագիտական լուծման ուղիներ գտնել», - Agence France-Presse-ին ասել է Գրոսսին:

Նա խոստովանել է, որ Իրանի միջուկային ծրագրի վերաբերյալ Գործողությունների համատեղ համապարփակ ծրագիրը (JCPOA), որը ստորագրվել է 2015 թվականին, իսկ հետագայում լքվել է Միացյալ Նահանգների կողմից, «դատարկ պատյան է»։ Մեկնաբանելով ԱՄՆ նախագահի պաշտոնում Դոնալդ Թրամփի ընտրությունը՝ Գրոսսին հայտարարել է, որ նրան հաջողվել է լավ աշխատել Հանրապետականի թիմի հետ Սպիտակ տանը նրա առաջին պաշտոնավարման ընթացքում, թեև հենց Թրամփի օրոք Վաշինգտոնը դուրս եկավ միջուկային գործարքից:

«Գործակալությունն աշխատում է Իրանում, ստուգումներ է անցկացնում, բայց ես միշտ ասել եմ, որ մեզ ավելի շատ թափանցիկություն է պետք։ Մենք պետք է կարողանանք տեսնել ավելին։ Հաշվի առնելով իրանական ծրագրի լայնությունը, խորությունը եւ հավակնոտությունը՝ մենք պետք է ուղիներ գտնենք գործակալությանը դիտարկման համար ավելի շատ հնարավորություններ տրամադրելու համար», - ասել է ՄԱԳԱՏԷ-ի ղեկավարը։

JCPOA-ն ստորագրվել է 2015 թվականին Իրանի և միջազգային միջնորդների խմբի կողմից՝ Ռուսաստանից, Մեծ Բրիտանիայից, Գերմանիայից, Չինաստանից, ԱՄՆ-ից և Ֆրանսիայից։ Համաձայնագիրը նշանավորեց 2004 թվականին սկսված ճգնաժամի ավարտը, երբ արևմտյան երկրները մեղադրեցին Իրանին միջուկային զենք ստեղծելու մեջ և պատժամիջոցներ սահմանեցին: Թրամփը 2018 թվականին որոշել է ԱՄՆ-ին դուրս բերել պայմանագրից։

Ինչպես հաղորդել Է The New York Times թերթը՝ վկայակոչելով իրանցի պաշտոնյաներին, Թեհրանում կարծում են, որ ընտրություններում Թրամփի վերջին հաղթանակից հետո միջուկային ծրագրի վերաբերյալ ԱՄՆ-ի հետ նոր համաձայնագիրն ավելի ամուր և երկարաժամկետ կլինի: