Իրանից նշել են՝ ինչի են հանգեցրել Թրամփի քայլերը և խորհուրդ տվել
ԱՄՆ-ի նորընտիր նախագահ Դոնալդ Թրամփը պետք է հրաժարվի Իրանի նկատմամբ այն քաղաքականությունից, որը նա վարում էր Սպիտակ տանն իր առաջին պաշտոնավարման ընթացքում: Այս մասին հայտարարել է ռազմավարական հարցերով Իրանի փոխնախագահ Ջավադ Զարիֆը: Հայտնում է Ինտերֆաքսը։
Նրա խոսքով՝ նկատի ունի Իրանի վրա «առավելագույն» ճնշման քաղաքականությունը, որը Թրամփը սկսել է իրականացնել 2016 թվականի ընտրություններում հաղթելուց հետո: Զարիֆը հավելել է, որ նման գործողությունները հանգեցրել են նրան, որ Թեհրանն ակտիվացրել է ուրանի հարստացումը:
Նախօրեին The Wall Street Journal թերթը, հղում անելով իր աղբյուրներին, հայտնել էր, որ Թրամփը պաշտոնը ստանձնելուց հետո կտրուկ կխստացնի Իրանի, մասնավորապես՝ նավթային ոլորտի դեմ պատժամիջոցները:
Պարբերականը հիշեցրել է, թե ինչպես է իր առաջին նախագահական ժամկետի ընթացքում Թրամփը դուրս եկել Թեհրանի հետ վեց երկրների համաձայնագրից, որը հայտնի է որպես գործողությունների համատեղ համապարփակ ծրագիր, որի նպատակն էր սահմանափակել Թեհրանի միջուկային ծրագիրը՝ տնտեսական պատժամիջոցների վերացման դիմաց:
Սպիտակ տան աղբյուրները կարծում են, որ Թրամփը կշարունակի Իրանի նկատմամբ իր քաղաքականությունը:
