ԱՄՆ ԶՈւ Գլխավոր հրամանատարության ղեկավարի նկատմամբ հետաքննություն է սկսվել. AP
ԱՄՆ պաշտպանության նախարարության քննիչները հետաքննություն են սկսել երկրի Զինված ուժերի Գլխավոր հրամանատարության ղեկավար Մայքլ Կուրիլլայի նկատմամբ: Այս մասին հաղորդում է Associated Press–ը՝ հղում տալով աղբյուրներին: Գեներալին կասկածում են մեկ այլ զինծառայողի հրելու մեջ:
Ինչպես հայտնում է Military.com-ը, միջադեպը տեղի է ունեցել սեպտեմբերի սկզբին Իսրայել մեկնող C-17 Globemaster III ռազմատրանսպորտային ինքնաթիռում: Գեներալն այն ժամանակ իբր դժգոհ է եղել կապի խնդիրներից։ Նա վիճաբանության մեջ է մտել անձնակազմի անդամների հետ և հրել նրանցից մեկին։
Գեներալը դեռ գլխավորում է հրամանատարությունը, որի օպերատիվ պատասխանատվության ոլորտն ընդգրկում է առաջին հերթին Մերձավոր Արևելքը։
ԱՄՆ բանակի քննչական բաժինը հայտնել է, որ «տեղյակ է ենթադրյալ միջադեպի մասին և ներկայումս ուսումնասիրում է այն»: Նշված ստորաբաժանումը The Washington Post-ի լրագրողներին հաստատել է, որ վարույթը վերաբերում է Կուրիլլային։
