Այսօր հնարավորություն չունենք ադրբեջանցու դեմ կռվելու. ԵԿՄ նախագահ

Միքայելյանի խոսքով՝ 20 տարի ադրբեջանցիները ժամանակակից զենք-զինամթերք էին առնում, իսկ Հայաստանի նախորդ իշխանություններն ալան-թալանով էին զբաղվում։

ԵԿՄ նախագահ Սասուն Միքայելյանը կողմ է հայ-ադբեջանական սահմանազատման գործընթացին, քանի որ ստեղծված իրավիճակում այլ ելք չի տեսնում։ Այս մասին նա հայտարարեց «Եռաբլուր» զինվորական պանթեոնում՝ Հոկտեմբերի 27-ի զոհերի հիշատակի արարողության ժամանակ:

«Ես կողմ եմ սահմանազատմանը, որովհետև այսօր ոչ մի հնարավորություն չունենք ադրբեջանցու դեմ կռվելու։ 20 տարի ադրբեջանցիները ժամանակակից զենք-զինամթերք էին առնում, իսկ մեր նախորդ իշխանություններն ալան-թալանով էին զբաղվում»,-ասաց Միքայելյանը։

վերջինս ընդգծեց, որ երկրապահները միշտ էլ իշխանության կողքին են եղել և չեն փորձի «քաղաքական խաղեր տալ»։

Միքայելյանի խոսքով՝ սահմանազատումն անհրաժեշտ է, որպեսզի Հայաստանը ազատ և անկախ պետություն դառնա, մի բան, որ այսքան տարի, ըստ նրա, չենք ունեցել։

Ինչ վերաբերում է Արցախյան խնդրին, Միքայելյանը նշեց, որ ինքը երբեք հույսը չի կտրել Արցախից։

«Միջազգային ատյաններում այդ հարցը դրված է, դիվանագետները զբաղվում են, որ Ղարաբաղի ժողովուրդը վերադառնա Ղարաբաղ»։