Ատելության և ահաբեկման մթնոլորտ. Եվրախորհրդարանը՝ Վրաստանի ընտրությունների մասին

Վրաստանի խորհրդարանական ընտրությունների քվեարկությունն անցել է ատելության և ահաբեկման մթնոլորտում: Այս մասին հայտարարել է ընտրություններում ԵԽ պատվիրակության ղեկավար, ԵԽ իսպանացի պատգամավոր Անտոնիո Լոպես-Իստուրիս Ուայթը, ում խոսքերը մեջբերված են Եվրախորհրդարանի մամուլի հաղորդագրությունում։

Նա նշել է, որ Վրաստանը հեռանում է ժողովրդավարությունից։

«Մենք մտավախություն ունենք, որ ատելության և ահաբեկման մթնոլորտը, որին ականատես եղանք ընտրությունների օրը, լրջորեն կխանգարի Վրաստանում քաղաքական գործընթացներին: Շատ կարևոր է, որ այն խախտումները, որոնք մատնանշվել են քվեարկության ժամանակ, ուսումնասիրվեն և հաշվի առնվեն»,- ասել է նա։

Վրաստանի խորհրդարանի ընտրություններն անցկացվել են հոկտեմբերի 26-ին։ Հաջորդ օրը միապալատ օրենսդիր մարմնի խոսնակ Շալվա Պապուաշվիլին ասել է, որ քվեաթերթիկների 99%-ը մշակելուց հետո իշխող «Վրացական երազանք-Ժողովրդավարական Վրաստան» կուսակցությունը ստացել է ձայների 54%-ը։ Սա քաղաքական ուժին թույլ է տալիս ստանալ խորհրդարանական 150 մանդատներից 90-ը։

Միևնույն ժամանակ, չորս ընդդիմադիր քաղաքական միավորումներ՝ «Կոալիցիան հանուն փոփոխությունների», «Ուժեղ Վրաստան», «Հանուն Վրաստանի» և «Միացյալ ազգային շարժում», չեն ճանաչել քվեարկության արդյունքները։ Ավելին, նշված առաջին կուսակցության անդամները հրաժարվել են պատգամավորական մանդատներից և պետական ​​ֆինանսավորումից։