Կա մի խումբ, որը պատրաստվում է հեղաշրջման․ Պապուաշվիլի
Վրաստանում կա մի խումբ, որը պետական հեղաշրջում է նախապատրաստում խորհրդարանական ընտրություններից հետո։ Այս մասին հայտարարել է Վրաստանի խորհրդարանի խոսնակ Շալվա Պապուաշվիլին։ Նրա խոսքերը մեջբերում է ՌԻԱ Նովոստին։
«Բոլոր նշանները ցույց են տալիս, որ կա մի խումբ, որը պատրաստվում է հեղաշրջման»,- ասել է Պապուաշվիլին:
Նրա խոսքով՝ իրենք ցանկանում են հակաժողովրդավարական ճանապարհով զավթել իշխանությունը, դրան միացված են տեղական դիտորդական ոչ կառավարական կազմակերպությունները:
Պապուաշվիլին պատմել է, որ նման հեղաշրջում նախատեսվում էր նաև ավելի վաղ՝ 2020 թվականի խորհրդարանական ընտրություններից հետո: Տվյալ խումբը պատրաստվում է գործել նույն սխեմայով. չարագործները դիտորդական ՀԿ-ների օգնությամբ պատրաստվում են կեղծ զեկույցներ կազմել ընտրությունների անցկացման մասին, որպեսզի Վրաստանում «հերթական անկարգությունների կեղծ առիթ ստեղծեն»:
Հիշեցնենք, որ Վրաստանի խորհրդարանական ընտրությունները տեղի կունենան հոկտեմբերի 26-ին:
Ավելի վաղ իշխող «Վրացական երազանք - Ժողովրդավարական Վրաստան» կուսակցության հիմնադիր Բիձինա Իվանիշվիլին հայտարարել էր, որ արևմտյան երկրները Վրաստանին առաջարկել են պատերազմ սկսել Ռուսաստանի հետ: Թե կոնկրետ երբ է դա եղել, քաղաքական գործիչը չի հստակեցրել։
