Մտավախություն չունե՞ք, որ Ադրբեջանն այդ կանոնակարգը չի վարերացնի․ հարց՝ փոխվարչապետին

Հայաստանի եւ Ադրբեջանի սահմանազատման հանձնաժողովների կանոնակարգի վավերացման գործընթացը սինխրոն ընթանում է: Այս մասին այսօր ԱԺ-ում լրագրողների հետ զրույցում ասել է ՀՀ փոխվարչապետ Մհեր Գրիգորյանը։

«Ուղղակի չգիտեմ՝ ո՞ր փուլում է Ադրբեջանում այդ գործընթացը, բայց ստորագրման պահին ստորագրման տրամաբանությունը ենթադրում է, որ սինխրոն պետք է լինի»,- ասաց նա:

Հարցին՝ մտավախություն չունի՞, որ Ադրբեջանը այդ կանոնակարգը չի վարերացնի, նա պատասխանեց. «Ես չունեմ նման մտավախություն: Չեմ կարծում, որ կձգձգեն»:

Անդրադառնալով ապաշրջափակման հարցով եռակողմ հանձնաժողովի նիստերի չշարունակվելուն, փոխվարչապետն ասաց. «Կան ֆունդամենտալ հարցեր, որոնց շուրջ պետք է լինի կոնսենսուս: Մինչեւ այդ կոնսենսուսը չլինի, դետալների շուրջ քննարկումներ շարունակելն ուղղակի իմաստ չունի»:

Այսօր՝ հոկտեմբերի 21-ին ԱԺ արտաքին հարաբերությունների մշտական հանձնաժողովում մեկնարկել է Հայաստանի եւ Ադրբեջանի միջեւ պետական սահմանի սահմանազատման եւ սահմանային անվտանգության հարցերով հանձնաժողովի ու Ադրբեջանի եւ Հայաստանի միջեւ պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին հարցը:

Հիշեցնենք, որ Կառավարությունը հավանություն է տվել այդ կանոնակարգին, իսկ ՍԴ-ն այն համարել է Սահմանադրությանը չհակասող՝ ընդգծելով, որ ՀՀ անկախության հռչակագիրը Սահմանադրության մաս չէ, թեեւ Սահմանադրությունում հղում կա Անկախության հռչակագրին: