Հայ բռնցքամարտիկը հաղթել է ադրբեջանցուն. նա ոսկե մեդալակիր է

Հայազգի բռնցքամարտիկ 51 կգ քաշային Ռուդոլֆ Գարբոյանը Բուլղարիայում ընթացող մինչև 22 տարեկանների Եվրոպայի առաջնության եզրափակիչում հաղթանակ է տարել ադրբեջանցի Նիջաթ Հուսեյնովի նկատմամբ։ Այս մասին հայտնում է Հայաստանի բռնցքամարտի ֆեդերացիան։

Այսօր ԵԱ–ի մրցումային վերջին օրն է։

«Ռուդոլֆ Գարբոյանը հաղթեց ադրբեջանցուն ու դարձավ մինչև 22 տարեկանների Եվրոպայի չեմպիոն։ Նա ստացել է մինչև 22 տարեկանների Եվրոպայի առաջնության ոսկե մեդալ»,– ասված է հաղորդագրությունում։

Հայաստանը ներկայացնող 57 կգ քաշային Ռուսլան Ասլիկյանն էլ արծաթ է նվաճել` համառ մենամարտում առաջին հորիզոնականը զիջելով Վրաստանը ներկայացնող Գոռ Այվազյանին։

Տղաների 13 քաշային կարգերից 4-ում Հայաստանն ունի եզրափակիչի մասնակից։

Դեռ պետք է մրցեն 60 կգ քաշային Արթուր Սահակյանն ու 67 կգ քաշային Հարություն Հակոբկոխյանը։

Հիշեցնենք, որ բռնցքամարտիկ 21-ամյա Էլիդա Քոչարյանն էլ հոկտեմբերի 19-ին 60 կգ քաշային կարգում Եվրոպայի չեմպիոնի կոչումը վիճարկում էր ուկրաինուհի Տատյանա Դովգալի հետ։ Համառ ու դժվարին մենամարտի երրորդ ռաունդում նա գերազանցեց մրցակցին ու հաղթանակ տարավ։