ՏԵՍԱՆՅՈՒԹ. Լիբանանում զոհերի թիվն էականորեն աճել է

Լիբանանի առողջապահության նախարարությունը հայտնել է, որ իսրայելական ավիահարվածների հետևանքով զոհերի թիվը հասել  է 274-ի:

Չի նշվում, թե նրանցից քանիսն են զինվորական, քանիսը` քաղաքացի։ Մոտ հազար մարդ վիրավորվել է։

Իսրայելի պաշտպանության բանակը երկուշաբթի առավոտյան հայտարարել է, որ լայնածավալ ավիահարվածներ է հասցրել Լիբանանում «Հեզբոլլահ» շարժման թիրախներին: Բանակի պնդմամբ՝ Լիբանանի սահմանամերձ գյուղերի բնակիչները նախազգուշացվել են, նրանց կոչ է արվել արագ հեռանալ այն տներից, որոնք «Հեզբոլլահ»-ն օգտագործում է զենք պահելու համար:

Այժմ Իսրայելի պաշտպանության բանակը Լիբանանի Բեքաա հովտի բնակիչներին 2 ժամ է տվել տարածքը լքելու համար: Նախազգուշացումը կրկին վերաբերում է այն խաղաղ բնակիչներին, որոնք, Իսրայելի բանակի պնդմամբ, գտնվում են տներում, որոնցում «Հեզբոլլահ»-ը պահում է իր զենքերը:

Զինվորականները հայտնել են, որ հայտնաբերել են «Հեզբոլլահ»-ի օպերատորներին, որոնք պատրաստվում էին հրթիռային հարձակումներ իրականացնել Իսրայելի վրա:

Իսրայելի ռազմաօդային ուժերը, ժամը 12:30-ի դրությամբ, տասնյակ կործանիչների միջոցով ավելի քան 300 հարված են հասցրել Լիբանանում «Հեզբոլլահ»-ի թիրախներին: