Որքան է Ուկրաինայի և Ռուսաստանի ընդհանուր ռազմական կորուստները սպանվածներով և վիրավորներով. ըստ WSJ-ի
Ըստ Wall Street Journal-ի՝ 2022 թվականի փետրվարի 24-ին ռուսական լայնամասշտաբ ներխուժման մեկնարկից ի վեր, պատերազմի ընթացքում Ուկրաինայի և Ռուսաստանի կողմից սպանվածների և վիրավորների ընդհանուր կորուստները գերազանցել են մեկ միլիոն թիվը։ Այսպես, հրապարակման համաձայն՝ հղում անելով Ուկրաինայի կառավարության գաղտնի տվյալներին, Ուկրաինայի մարտական կորուստները գնահատվում են 80 հազար սպանված և 400 հազար վիրավոր: Ռուսաստանի կորուստները, գրում է հրատարակությունը՝ վկայակոչելով արեւմտյան հետախուզական ծառայությունների գնահատականը, կազմում են 200 հազար սպանված եւ 400 հազար վիրավոր։ Բրիտանական ռազմական հետախուզությունը նման գնահատական է տալիս ռուսական կորուստների վերաբերյալ։ Բացի այդ, Մեծ Բրիտանիայի պաշտպանության նախարարությունը նշել է ռուսական բանակ նորակոչիկների համալրման տեմպի նվազեցման մասին։
«2024 թվականին ռուս զինվորականների հավաքագրման տեմպերը նվազել են 2023 թվականին ձեռք բերված տեմպերի համեմատ։ 2023 թվականի վերջին ռուս պաշտոնյաները պնդում էին, որ Ռուսաստանի պաշտպանության նախարարությունը օրական հավաքագրում է մոտ 1600 մարդ։ Սակայն այս տարի, ըստ հրապարակված տվյալների, այդ ցուցանիշը կազմում է օրական մոտ 1000 մարդ։ Այս թվերն իրենք, հավանաբար, որոշ չափով գերագնահատված են»,- հայտնել է բրիտանական ռազմական գերատեսչությունը «X» սոցիալական ցանցում։
Ուկրաինայի գլխավոր դատախազությունը հայտարարել է Նովոգրոդովկայում (Դոնեցկի մարզ) ռուս զինծառայողների կողմից ուկրաինացի զինծառայողի հավանական մահապատժի վերաբերյալ հետաքննություն սկսելու մասին։
«Այս պահին մենք փորձում ենք ճշտել, թե կոնկրետ երբ է տեղի ունեցել այս իրադարձությունը, քանի որ գտնվելու վայրը քիչ թե շատ պարզված է։ Մենք փորձում ենք պարզել զոհի ինքնությունը, ինչպես նաև բոլոր նրանց, ովքեր ներգրավված են այս հանցագործության կատարման մեջ»,- ազգային հեռուստամարաթոնի ժամանակ ասել է Ուկրաինայի գլխավոր դատախազության բաժնի ղեկավար Դենիս Լիսենկոն։
Ուկրաինայի օմբուդսմեն Դմիտրի Լուբինեցը դիմել է ՄԱԿ-ին և Կարմիր Խաչին՝ պահանջելով արձանագրել Ռուսաստանի կողմից մարդու իրավունքների խախտումները։
