Արևմուտքի կողմից Իսրայելին զենքի ապօրինի մատակարարումները թաքցնելու համար` Իրանին են մեղադրում. Իրանի ԱԳՆ խոսնակ
Ռուսաստանին և մի շարք այլ երկրներին իբր իրանական սպառազինության փոխանցման մասին հաղորդագրությունները սուտ են, դրանք կոչված են թաքցնելու Արևմուտքի կողմից Իսրայելին զենքի ապօրինի մատակարարումները, այդ մասին հայտարարել է Իրանի ԱԳՆ խոսնակ Նասեր Քանանին՝ X-ի իր էջում։
Սեպտեմբերի 2-ին Bloomberg գործակալությունը, հղում անելով իր աղբյուրներին, հայտնել էր, որ Թեհրանը մոտ ժամանակներս բալիստիկ հրթիռներ կտեղափոխի Մոսկվա: Ըստ աղբյուրի՝ ՌԴ-ն, իբր, պատրաստվում էր այդ արկերն օգտագործել Ուկրաինայում ռազմական գործողություններ վարելու համար։
Մեկնաբանելով իրավիճակը՝ Կրեմլի մամուլի քարտուղար Դմիտրի Պեսկովը ուշադրություն էր հրավիրել, որ նման տեղեկությունները «միշտ չէ, որ համապատասխանում են իրականությանը»։ Ընդ որում, Ուկրաինայի ԱԳՆ-ն այդ լուրերի ֆոնին հետ է կանչել Իրանի գործերի ժամանակավոր հավատարմատար Շահրիյար Ամուզեգարին:
Ավելի վաղ հայտնի էր դարձել, որ արևմտյան երկրները մտադիր են պատժել Իրանին՝ իբր Ռուսաստանին հրթիռներ մատակարարելու համար:
