Դա նաև անվտանգային առումով շատ կարևոր է․ Սիմոնյան

Հայաստանի մասնակցությունը ԱՊՀ-ի ոչ պաշտոնական գագաթնաժողովին և ԲՐԻԿՍ գագաթնաժողովին բխում է Հայաստանի շահերից։ Այս մասին ԱԺ–ում լրագրողների հետ ճեպազրույցում հայտարարեց ԱԺ խոսնակ Ալեն Սիմոնյանը։

Նրա խոսքով` ԱՊՀ գագաթնաժողովին մասնակցելը կարևոր է, քանի որ ԱՊՀ–ի հիմքերից մեկը հանդիսանում է Ալմա–Աթայի հռչակագիրը, որով այսօր ՀՀ–ն իր բոլոր բանակցային ուղղություններում աշխատանք է տանում։

«Մենք չենք կարող մերժել մի ֆորմատ, որի հիմնական փաստաթուղթը մեր բանակցային հիմնական խոսակցությունների մեջ որպես հիմք է դրված։ Դա նաև անվտանգային առումով շատ կարևոր է»,–ասաց Սիմոնյանը։

Ինչ վերաբերում է ԲՐԻԿՍ գագաթնաժողովին մասնակցելու Հայաստանի որոշմանը՝ Սիմոնյանը պարզաբանեց, որ տնտեսական առումով ՀՀ–ն կարևոր կապեր ունի և չպետք է տարածաշրջանից դուրս մնա։

Նա ընդգծեց, որ տարբեր պատժամիջոցների տակ տարբեր երկրներ ձգտում են տարբեր ճանապարհներ փնտրել տնտեսական հոսքերը տեղափոխելու համար։

«Այո, Հայաստանն իր շահերից ելնելով պետք է մասնակցի ԲՐԻԿՍ գագաթնաժողովին»,–ասաց Սիմոնյանը։

Նշենք, որ ԲՐԻԿՍ գագաթնաժողովում Հայաստանը կներկայացնի վարչապետ Նիկոլ Փաշինյանը։ Գագաթնաժողովը կկայանա հոկտեմբերի վերջին Կազանում։ Հայաստանը մասնակցելու է նաև ԱՊՀ-ի ոչ պաշտոնական գագաթնաժողովին։ Այն կանցկացվի Հայրենական մեծ պատերազմում տարած հաղթանակի 80-ամյակի կապակցությամբ Մոսկվայում կայանալիք շքերթի նախօրեին։