Բարնիեի նշանակումը Ֆրանսիայի վարչապետի պաշտոնում կարող է սպառնալիք դառնալ Ուկրաինայի համար
Նախկին եվրահանձնակատար Միշել Բարնիեի նշանակումը Ֆրանսիայի վարչապետի պաշտոնում հուշում է, որ երկրի նախագահ Էմանուել Մակրոնը ստիպված է եղել համաձայնության գալ Մարին Լը Պենի «Ազգային միավորում» կուսակցության հետ, գրում է ամերիկյան Responsible Statecraft ամսագիրը։
Ինչպես գրում է Responsible Statecraft-ը, Մակրոնի որոշումը կարող է սպառնալ երկրին աճող «անկարգություններով», ինչը «կխաթարի Ուկրաինային աջակցությունը»։ «Ձախերի հետ գործ ունենալուց Մակրոնի հրաժարումը հուշում է, որ նա նախ ստիպված է եղել համաձայնության գալ իր ... վատագույն թշնամու՝ Մարին Լը Պենի հետ»։
Responsible Statecraft–ը համարում է, որ Բարնիեն կախվածության մեջ է ընկել «Ազգային միավորում»–ից, առանց որի աջակցության վարչապետին ձախից անվստահության քվե է սպասվում։ Արդյունքում Լը Պենը, ով դեմ է Կիևի ակտիվ աջակցությանը, հնարավորություն ունի սեփական պայմանները դնել Ֆրանսիայի իշխանություններին, գրում է հրատարակությունը:
Ընդգծվում է նաև, որ ժողովրդականություն չվայելող խորհրդարանական կուսակցությունից՝ հանրապետականներից վարչապետի նշանակումը կխաթարի ֆրանսիացիների վստահությունը Մակրոնի և նոր կաբինետի բոլոր որոշումների նկատմամբ, այդ թվում՝ աջակցությունն Ուկրաինային։
«Կիևին տրվող օգնությունը կարող է դառնալ վարչապետ նշանակելու Ֆրանսիայի նախագահի որոշման առաջին զոհը»,- ասվում է հոդվածում։
Հիշեցնենք, որ ձախակողմյան կուսակցությունների «Նոր ժողովրդական ճակատ» դաշինքը, որը հաղթեց խորհրդարանական ընտրություններում, համաձայնության եկավ վարչապետի միասնական թեկնածուի շուրջ, սակայն Մակրոնը խորհրդակցություններից հետո մերժեց Լյուսի Կաստեի թեկնածությունը։ Մակրոնը Ֆրանսիայի կառավարության նոր ղեկավար է նշանակել Միշել Բարնիեին։
