ՏԵՍԱՆՅՈՒԹ․ Իսկ ո՞վ է ասել, որ Կիրանցի հատվածում չենք ստացել մեր ակնկալած հատվածը․ Եղոյան
Դուք սխալ եք պատկերացնում բանակցային գործընթացը, այնպես եք պատկերացնում, որ մեկը մտնում է սենյակ ու ասում՝ ողջույն, դուք դո՞ւրս եք գալու մեր տարածքներից. Այդպես չեն խոսում բանակցությունների ժամանակ: Այս մասին այսօր ԱԺ-ում լրագրողների հետ զրույցում հայտարարեց ՀՀ ԱԺ եվրոպական ինտեգրման հարցերի մշտական հանձնաժողովի նախագահ Արման Եղոյանը:
«Խոսքը միմյանց տարածքային ամբողջականությունը ճանաչելու մասին է, խոսո խոսվում է, թե ինչ սահմաններով են ճանաչում դա: Ամեն մեկը մի տարբերակ է ասում, հետո դա գնում է քննարկման, բանակցությունների: Հետո քննարկվում է արդեն, թե ինչ քարտեզներով, որտեղ արդեն մետրերի հարց է լուծվում: Վերջում հարցը գալիս է նրան, որ այսինչ հատվածում սահմանը պետք է լինի այսպիսին: Պարզ է, որ այն բոլոր տարածքները, որտեղ իրենք մտել են, վերջում պիտի դուրս գան այդ տարածքներից: Տրամաբանությունը դա է»,-ասաց Եղոյանը:
Անդրադառնալով բանակցությունների ձեւաչափին, նա ասաց. «Այս պահին երրորդ կողմի միջնորդության կարիքը չկա, վաղը կարող է առաջանալ»:
Ինչ վերաբերում է նրան, որ Ադրբեջանը Տավուշի հատվածում ստացավ իր ակնկալածը, իսկ մյուս հատվածներում, որտեղ Հայաստանը պետք է ստանա, անորոշ է, Եղոյանն ասաց. «Իսկ ո՞վ է ասել, որ Կիրանցի հատվածում չենք ստացել մեր ակնկալած հատվածը»:
Հարցին՝ ո՞ր հատվածն ենք ստացել, նա արձագանքեց. «Չեզոք գոտու մեր հատվածը, առաջ այնտեղ մարդ չէր կարող մտնել, հիմա կարող է մտնել: Առաջ ականապատված էր, ոչ ոք չէր կարող այնտեղ մտնել, հիմա դա գտնվում է գծից այս կողմ: Բնականաբար, որոշ բաներ էլ գտնվում են գծից այն կողմ»:
