Որքան գումար է ծախսվել պետական բյուջեից Փաշինյանի՝ Սևանի շուրջ իրականացրած երկօրյան հեծանվային արշավին. Civilnet.
Որքան գումար է ծախսվել պետական բյուջեից վարչապետ Նիկոլ Փաշինյանի՝ Սևանի շուրջ իրականացրած երկօրյան հեծանվային արշավին: Civilnet.am-ն ուսումնասիրել է միջոցառման անցկացման համար կնքված երկու պայմանագրերը: Ինչպես նշվում է, օգոստոսի 24-ին եւ 25-ին հեծանվային երկօրյա արշավ է կազմակերպվել Սեւանա լճի շուրջ:
Լրատվամիջոցը պարզել է, որ արշավի մասնակիցների երկօրյա սննդի, նախաճաշերի, ճաշերի եւ ընթրիքի համար վճարել են հարկատուները: Ավելին մենք վճարել ենք նաեւ վրանների, բիոզուգարանների, 10-ը հեծանիվի վարձույթի, 200 շապիկի, 100 ուսապարկի տրամադրման եւ մի շարք այլ ծառայությունների համար:
Այս նպատակով վարչապետի աշխատակազմը ըստ պետական գնումների կայքի կնքել է 2 պայմանագիր:
Դրանցից մեկը կնքվել է «Էլյա Ավագյան» ԱՁ-ի հետ օգոստոսի 23-ին: 100 անձի համար երկու օր նախաճաշ, ճաշ եւ 1 ընթրիք ձեռք բերելու համար վճարվել է շուրջ 5 մլն դրամ կամ 12,8 հազար դոլար։ Ինչ վերաբերում է վրանների, հեծանիվների եւ այլ իրերի վարձույթին, ապա այդ մասով պայմանագիր է կնքվել Լիգիա Վարդանյան ԱՁ-ի հետ: Պայմանագրի գումարը 9,6 մլն դրամ է կամ 24 հազար 500 դոլար: Երկու անհատ ձեռներեցների հետ պայմանագրերը կնքվել են հրատապ, մեկ անձ ընթացակարգով:
Հարկատուների՝ գրպանից փոխանցված հարկերի հաշվին առնվազն 37 հազար ԱՄՆ դոլար է արժեցել Սեւանի շուրջ երկօրյա հեծանվավազքը։ Առնվազն, քանի որ հայտնի չէ ինչ միջոցներից են օրինակ գնվել Փաշինյանի հեծանիվը, ինչքան գումար է հատկացվել վարչապետի սոցկայքի էջում հրապարակված տեսանյութերի պատրաստմանը կամ ինչ այլ ծախսեր են արվել, որոնք արտացոլված չեն պետական գնումների կայքում, փոխանցում է Սիվիլնեթը:
