Մասկը կարող է կորցնել բիզնեսը երկրներից մեկում

Ամերիկացի ձեռներեց Իլոն Մասկին պատկանող Starlink ընկերությունը կարող է զրկվել Բրազիլիայում գործունեություն ծավալելու թույլտվությունից, եթե գործարարը չկատարի X սոցիալական ցանցն արգելափակելու պահանջները։ Այս մասին հայտնում է G1-ը՝ հղում անելով Հեռահաղորդակցության ազգային գործակալության նախագահ Կառլոս Բայգորրին։

«Սա համապատասխանում է վարչական վարույթի մասին օրենքին։ Հնարավոր պատժամիջոցները նախատեսված են հեռահաղորդակցության ընդհանուր օրենքով՝ սկսած նախազգուշացումից, տուգանքից, ապա արտոնագրի չեղարկումից»,- ասել է Բայգորրին։

Գործակալության նախագահը հավելել է, որ Starlink-ը կարող է կորցնել երկրում գործելու հնարավորությունը, եթե երկրի կառավարությունը հետ վերցնի արտոնագիրը։

Օգոստոսի 17-ին X սոցիալական ցանցը հայտարարեց Բրազիլիայում իր գործունեությունը հրատապ դադարեցնելու մասին։ Այս որոշումը երկրի իշխանությունների կողմից գրաքննության հարցերի շուրջ Գերագույն դատարանի դատավորների հետ կոնֆլիկտի արդյունք էր։

Օգոստոսի 29-ին Բրազիլիայի Դաշնային Գերագույն դատարանի դատավոր Ալեքսանդրի դե Մորաիսը ծանուցագիր էր ուղարկել Մասկին, որով կարգադրում էր 24 ժամվա ընթացքում Բրազիլիայում X սոցցանցի նոր օրինական ներկայացուցիչ նշանակել։ Սակայն ձեռնարկատերը հրաժարվել էր կատարել այս պահանջը։

Օգոստոսի 30-ին Բրազիլիայի Գերագույն դատարանը որոշում էր կայացրել անհապաղ դադարեցնել սոցիալական ցանցի գործունեությունը երկրում։