Իրաքում թուրքական ԱԹՍ է խոցվել․ ԶԼՄ
Իրաքի հակաօդային պաշտպանության ուժերը թուրքական անօդաչու թռչող սարք են խոցել երկրի հյուսիսում գտնվող համանուն նահանգի վարչական կենտրոն Քիրքուք քաղաքի երկնքում։ Այս մասին հաղորդել է Shafaq News լրատվական հարթակը։
Ինչպես նշել է տարածաշրջանի անվտանգության ուժերում լրատվամիջոցի աղբյուրը՝ թուրքական անօդաչուն Իրաքի օդային տարածություն է անցել հարևան Սուլեյմանիա նահանգի կողմից։ Հենց անօդաչուն մտել է խոցման գոտի, այն հարված է ստացել իրաքցի զինվորականների կողմից։ Սարքը հայտնաբերվել է առավոտյան։ Հաղորդվում է, որ միջադեպի հետևանքով տուժածներ չկան:
Իրաքի անվտանգության ուժերն ապամոնտաժել են ԱԹՍ-ի խոցման վայրում հայտնաբերված հրթիռը։ Ըստ ոստիկանության աղբյուրի՝ միջադեպը տեղի է ունեցել խիտ բնակեցված հատվածում և կարող էր շատ ավելի աղետալի հետևանքներ ունենալ, եթե պայթեր։
Հավելենք, որ Թուրքական կողմը դեռ չի մեկնաբանել տեղեկատվությունը։
