«Մեր կարծիքով՝ տուգանքի չափը բավականին ցածր է և անհրաժեշտ է այն ավելացնել»․ Ավետիսյան

Երևանի քաղաքապետարանը քննարկում է կառուցապատման ընթացքում փոշու արտանետումները կանխարգելող միջոցառումները չկատարելու հետևանքով տուգանքների չափի բարձրացման հարցը։ «Արմենպրես»-ի թղթակցի հետ զրույցում Երևանի քաղաքապետարանի Բնապահպանության վարչության պետի տեղակալ Գորիկ Ավետիսյանը համոզմունք է հայտնեց, որ տուգանքի չափը պետք է համադրելի լինի կառուցապատման ընթացքում փոշու արտանետումները կանխարգելող միջոցառումների իրականացման ծախսերի հետ։

Նրա տեղեկատվությամբ՝ Երևանի քաղաքապետարանում տեղի ունեցած վերջին գործակարգավարական նիստերից մեկի ժամանակ քաղաքապետը հանձնարարել է մշակել կարգ շինարարական օբյեկտներում պաշտպանիչ ցանցերի կահավորման վերաբերյալ։ Մյուս հանձնարարականի համաձայն էլ քաղաքապետարանի աշխատակազմի իրավաբանական վարչությունը տուգանքի չափերի փոփոխության վերաբերյալ համապատասխան աշխատանքներ է իրականացնում։

«Մեր կարծիքով՝ տուգանքի չափը բավականին ցածր է և անհրաժեշտ է այն ավելացնել, որպեսզի համադրելի լինի  ծախսերի հետ, որոնք շինարարը պետք է իրականացնի՝ օդի որակի մոնիթորինգի սարքերը տեղադրելու կամ ցանցապատում իրականացնելու հետ կապված։  Չստացվի այնպես, որ իրենք, զուտ ծախսերին նայելով, որոշեն, որ տուգանքն ավելի քիչ է, և ավելի ձեռնտու է մի քանի անգամ տուգանվելը, քան համապատասխան միջոցառումները իրականացնելն ու արտանետումները նվազեցնելը»,-պարզաբանել է Ավետիսյանը՝ հավելելով, որ քաղաքապետարանի իրավաբանական վարչությունը կուսումնասիրի միջազգային փորձը և կհամադրի տուգանքի չափերն ու այդ ծախսերը՝ ավելի խելամիտ տուգանքի չափ որոշելու համար, որից հետո  քաղաքապետարանը կնախաձեռնի օրենքի մեջ համապատասխան փոփոխության գործընթաց։