Ե՞րբ սպասել 2024 թվականի ամենամեծ գերլուսնին

Այս տարվա ամենամեծ գերլուսինը կդիտվի հոկտեմբերի 17-ին։ Այս օրը Լուսինը կհասնի իր ամբողջական փուլին՝ գտնվելով Երկրից նվազագույն հեռավորության վրա, հայտնում է Մոսկվայի պլանետարիումը։

Ըստ պլանետարիումի՝ հոկտեմբերի 17-ին Մոսկվայի ժամանակով ժամը 03:47-ին (Երևանի ժամանակով 04:47-ին) Լուսինը Երկրին կմոտենա 357172 կմ, ինչը 2024 թվականի ամենամոտ հեռավորությունն է։ Լիալուսնի փուլը կսկսվի Մոսկվայի ժամանակով 14:28-ին (Երևանի ժամանակով 15:28-ին):

Դրանից մեկ ամիս առաջ՝ սեպտեմբերի 18-ին, երկնքում տեսանելի կլինի 2024 թվականի երկրորդ ամենամեծ լիալուսինը, թեև այս օրը Լուսինը Երկրից ավելի հեռու կլինի հոկտեմբերի գերլուսինից:

Գերլուսին ասելով հասկանում ենք, որ լիալուսինը գտնվում է Երկրից նվազագույն հեռավորության վրա: Այս պահին Լուսինը 14%-ով ավելի մեծ է թվում, քան երբ այն գտնվում է իր ուղեծրի ամենահեռավոր կետում:

Նախորդ գերլուսինը դիտվել է օգոստոսի 19-ին։