Ավստրալիայում թույլատրել են անտեսել գործատուի զանգերը ոչ աշխատանքային ժամերին

Ավստրալիայում օգոստոսի 26-ից ուժի մեջ է մտել օրենքը, որը քաղաքացիների շրջանում հայտնի է որպես «անջատման իրավունք»։ Այս մասին հայտնում է BBC-ն։

Նոր օրենքը ողջ երկրում քաղաքացիներին թույլատրում է աշխատանքային օրվա ավարտից հետո չընդունել զանգեր և անտեսել իրենց վերադասի հաղորդագրությունները՝ չվախենալով գործատուի կողմից պատժից։ Օրենքն ընդունվել է աշխատողների անձնական կյանքի իրավունքը պաշտպանելու համար:

Ավելի վաղ անցկացված հետազոտությունը ցույց էր տվել, որ ավստրալացիները տարեկան աշխատում են միջինը 281 ժամ արտաժամյա աշխատանք՝ առանց հավելյալ վարձատրության: Նման կանոնները գործում են ավելի քան 20 երկրներում, հիմնականում՝ Եվրոպայում և Լատինական Ամերիկայում։

Ինչպես նշում է BBC-ն, օրենքը գործատուին չի արգելում  կապ հաստատել աշխատակիցների հետ ոչ աշխատանքային ժամերին, սակայն այն աշխատողին իրավունք է տալիս չպատասխանել զանգերին ու հաղորդագրություններին։

Եթե ​​ղեկավարության և աշխատակցի միջև որևէ վեճ ծագի նոր կանոնների շուրջ, նրանք նախ պետք է փորձեն լուծել տարաձայնությունը, եթե լուծում չգտնվի, Ավստրալիայի արդար աշխատանքի հանձնաժողովը (FWC) կարող է միջամտել: Հանձնաժողովը կարող է պաշտոնապես կարգադրել գործատուին դադարեցնել կապը աշխատողի հետ նրա աշխատանքային օրվա ավարտից հետո: Իսկ եթե աշխատակցի՝ աշխատանքից հետո շփվելուց հրաժարվելը համարվում է «անհիմն», պարտավորեցնել նրան պատասխանել զանգերին և հաղորդագրություններին։ Նշվում է, որ  կարգադրությունը չկատարելը կարող է հանգեցնել մինչև 19,000 ավստրալական դոլարի (ավելի քան 12,000 ԱՄՆ դոլար) տուգանքի՝ աշխատակցի համար և մինչև 94,000 ավստրալական դոլարի (ավելի քան 63,000 ԱՄՆ դոլար) ընկերության համար։

 «Օրենքը թույլ կտա աշխատողներին հրաժարվել աշխատանքային ժամերից դուրս ղեկավարության հետ անհարկի շփումից և ապահովել աշխատանքի և կյանքի ավելի լավ հավասարակշռություն», - ասվում է Ավստրալիայի արհմիությունների խորհուրդում: