Ուկրաինական ուժերը Կուրսկի շրջանի վրա հարձակման ժամանակ շրջանցել են չեչենական «Ախմատ» ստորաբաժանումը
ՌԴ Կուրսկի շրջան ներխուժած ուկրաինացի զինվորականներն անցել են չեչենական «Ախմատ» ստորաբաժանման հենակետերի մոտով, որը պետք է պաշտպաներ սահմանը։ Այս մասին հայտարարել է «Ախմատի» հատուկ նշանակության ջոկատի հրամանատար Ապտի Ալաուդինովը Կուրսկի շրջանում տիրող իրավիճակի մեկնաբանելիս։
Ալաուդինովը հայտնել է, որ «Ախմատի» հատուկ նշանակության ստորաբաժանումներից մեկի հետ արդեն Կուրսկի շրջանում է։ Միևնույն ժամանակ, ըստ նրա, տարածաշրջանում «ոչ մի կրիտիկական կամ ողբերգական բան» տեղի չի ունեցել։
Նրա խոսքով՝ «Ախմատ» ստորաբաժանման բոլոր մարտիկները, որոնք մինչ մարտերի մեկնարկը եղել են Կուրսկի շրջանի սահմանին, դեռ գտնվում են իրենց դիրքերում, իսկ Ուկրաինայի ԶՈւ-ն շրջանցել է նրանց։
Ալաուդինովը իրավիճակի մեկնաբանությամբ տեսանյութը հրապարակել է օգոստոսի 7-ի երեկոյան։ Գործակալության լրագրողներն այսօր դրա վրա ուշադրություն են հրավիրել այն տեղեկությունների ֆոնին, որ Կուրսկի շրջանում սահմանը պաշտպանող չեչենական ստորաբաժանումները դիմադրություն ցույց չեն տվել Ուկրաինայի զինված ուժերին։
Ռուս ռազմական մեկնաբան Յուրի Կոտենոկը նույն օրը հայտարարեց, որ ուկրաինական հարձակումը Կուրսկի շրջանում հետ մղվում է սահմանապահների և աշխարհազորայինների կողմից, բացի մարտական գոտում գտնվող «Ախմատի» մարտիկներից։
«Մարտական զեկույցների ողջ օրվա ընթացքում ես ոչ մի հիշատակում չտեսա «Տիկտոկի զորքերի» մասին»,- գրել է նա։
