«Աղքատությունը 600 հազար մարդու դռանն է կանգնած»․ Նարեկ Կարապետյան

«Ուժեղ Հայաստան» խմբակցության ղեկավար Նարեկ Կարապետյանը հայտարարել է, որ Հայաստանի տնտեսական մոդելը արմատական փոփոխության կարիք ունի։

Նրա խոսքով՝ վերջին տարիների տնտեսական աճը տնտեսության մեջ որակական փոփոխությունների չի հանգեցրել։

«Մեր երկրում աղքատությունը 600 հազար մարդու դռանն է կանգնած։ Վերջին ութ տարվա ընթացքում՝ մինչև 2024 թվականը, աղքատության ցուցանիշը նվազել է ընդամենը 2-3 տոկոսով, այն դեպքում, երբ երկիրը 7-8 միլիարդ դոլարի նոր վարկ է ներգրավել»,- ԱԺ-ում ասել է Կարապետյանը։

Նա նշել է, որ վերջին տարիներին գրանցված շուրջ 5 տրիլիոն դրամ տնտեսական աճին զուգահեռ ավելացել են ինչպես պետական պարտքը, այնպես էլ քաղաքացիների վարկային պարտավորությունները։

«Մոտավորապես ամբողջ տնտեսական աճը՝ 5 տրիլիոն դրամից շուրջ 2,5 տրիլիոնը, ժողովրդի վերցրած վարկերն են, շուրջ 2,4 տրիլիոնը՝ պետության վերցրած վարկերը։ Որակական փոփոխություն մեր տնտեսության մեջ, ցավոք, չկա»,- ասել է նա։

Կարապետյանն անդրադարձել է նաև գյուղատնտեսությանը՝ նշելով, որ 2026 թվականի առաջին կիսամյակում ոլորտում անկում է գրանցվել։

«Տնտեսական մոդելի արմատական փոփոխություն է պետք։ Այս մոդելով մենք Լիբանանի օրն ենք ընկնելու»,- հայտարարել է նա։

Նրա խոսքով՝ Հայաստանի տնտեսական ակտիվությանը ներկայում նպաստում են պղնձի բարձր գինը և ռուս-ուկրաինական պատերազմի հետևանքով առաջացած ֆինանսական հոսքերը, սակայն դրանք ժամանակավոր գործոններ են։