ՏԵՍԱՆՅՈՒԹ․ Երևանում օդի աղտոտվածության մակարդակը բարձր է՝ չնայած տեղադրվել են փոշին կլանող սարքեր
2024 թվականի առաջին կիսամյակում Երևանի շինհրապարակներում օդի աղտոտվածության վերաբերյալ 534 վարչական իրավախախտումների արձանագրություն է կազմվել։ Տեղեկությունը ասուլիսում հայտարարեց Երևանի քաղաքապետարանի քաղաքաշինության և հողի վերահսկողության վարչության պետի տեղակալ Ռուբեն Խոջոյանը։
Նշված արձանագրություններից մեծ մասը (147–ը) կազմվել է փոշեկլանիչ ցանցերի բացակայության համար, մի շարք դեպքերում (78) բացակայել են օդի որակի մոնիտորինգի սարքերը:
Խոջոյանը տեղեկացրեց, որ այս պահին Երևանում կառուցվում են 248 բազմաբնակարան շենքեր, և գրեթե բոլոր կառուցապատողների նկատմամբ կազմվել են այդ իրավախախտումների արձանագրությունները։
«Կառուցապատողները տուգանվել են 70.000-100.000 դրամի չափով։ Լինում են նաև նույն կառուցապատողի կողմից իրավախախտումների կրկնության դեպքեր, այդ դեպքում տուգանքների չափն ավելանում է»,– ասաց նա։
Նա ընդգծեց, որ Երևանի քաղաքապետարանը ոչ թե մարդկանց տուգանելու խնդիր է դրել, այլ որ բոլոր կառուցապատողները կատարեն կարգով սահմանված պահանջները։
Երևանի քաղաքապետարանի բնապահպանության վարչության պետի տեղակալ Գորիկ Ավետիսյանն էլ հայտնեց, որ տարեսկզբից մինչ օրս իրենք օդի որակի մոնիտորինգի 60 սարք են տեղադրել 30 կառուցապատողների մոտ (ամեն շինհրապարակում 2 հատ)։
Նա նշեց` եթե համապատասխան ծրագրով իրենք տեսնում են որևէ կառուցապատողի մոտ նորմայի սահմաններից շեղում է գրանցվել, ապա անմիջապես այցելում են շինհրապարակ և համապատասխան միջոցառումներ իրականացնում։
