Իսրայելական բանակը կսկսի վճռական գործողություններ․ Հալևի

Իսրայելի պաշտպանության բանակի (ՑԱԽԱԼ) գլխավոր շտաբի ղեկավար Հերցի Հալևին երեկ տեղի ունեցած գնդակոծությունից հետո ժամանել Է Գոլանի բարձունքներում գտնվող Մաջդալ Շամս քաղաք, հանդիպել տեղի իշխանությունների հետ և բնակավայրի վրա հարձակման մեջ մեղադրել շիական «Հեզբոլլահ» կազմակերպությանը:

«Մենք հստակ գիտենք, թե այսօր որտեղից է արձակվել հրթիռը։ <...> Մենք գիտենք, որ դա Falaq հրթիռ է՝ 53 կգ մարտագլխիկով։ Դա «Հեզբոլլահ»-ի հրթիռն է», — հայտարարել Է գեներալը։

Իսրայելի գլխավոր շտաբի ղեկավարի խոսքով՝ ներկայումս ՑԱԽԱԼ-ը պատրաստվում է հյուսիսում ռազմական գործողությունների նոր փուլին և գիտի, թե «ինչպես հարված հասցնել նույնիսկ Իսրայել պետությունից շատ հեռու»: Հալևին հավելել է, որ անհրաժեշտ պահին իսրայելական բանակը կսկսի վճռական գործողություններ:

Հիշեցնենք՝ հուլիսի 27-ին Իսրայելի կողմից վերահսկվող Գոլանի բարձունքները գնդակոծության են ենթարկվել, ինչի հետևանքով տուժել է ավելի քան 30 մարդ, այդ թվում՝ Մաջդալ Շամս քաղաքի խաղահրապարակում խաղացող երեխաները: Երկրի պաշտպանության բանակը հայտարարել է, որ հրթիռն արձակվել է Լիբանանի հարավից «Հեզբոլլահ»-ի կողմից:

Իսրայելական բանակի պաշտոնական ներկայացուցիչ Դանիել Հագարին հայտնել է, որ հարվածը հասցվել Է իրանական Falaq-1 հրթիռով: Վարչապետ Բենիամին Նեթանյահուն խոստացել է, որ այդ հարձակումն անպատասխան չի մնա: