Զելենսկին խոստացել է խաղաղության հասնելու համար մինչև նոյեմբերի վերջ գործողությունների ծրագիր մշակել
Ուկրաինայի նախագահ Վլադիմիր Զելենսկին ճապոնական հանրային հեռուստատեսությանը (NHK) տված հարցազրույցում հայտարարել է, որ Ուկրաինան նախատեսում է մշակել գործողությունների ծրագիր՝ մինչև 2024 թվականի նոյեմբերի վերջը երկրում խաղաղության հասնելու համար:
Ուկրաինայի նախագահը նշել է, որ նման խնդիր է դրել իր վարչակազմի ու դիվանագիտական թիմի առջեւ։
Զելենսկին վստահություն է հայտնել, որ ուկրաինական բանակի ուժեղացումը, առաջին հերթին ԱՄՆ-ի աջակցությունը և Ռուսաստանի վրա միջազգային դիվանագիտական ճնշումը երեք բաղադրիչներն են, որոնք հակամարտությունը կհանգեցնեն արդար ավարտի։
Բացի այդ, Ուկրաինայի նախագահը հայտնել է, որ ստացել է հակամարտությունը սառեցնելու ոչ պաշտոնական առաջարկներ, սակայն նշել է, որ չի կարող ընդունել դրանք։
Ավելի վաղ նա հայտարարել էր, որ Ուկրաինայի խաղաղության հարցով երկրորդ գագաթնաժողովին պետք է մասնակցեն ՌԴ ներկայացուցիչները՝ միաժամանակ չբացառելով Մոսկվայի հետ բանակցությունները:
