![Ուկրաինան ծրագիր ունի. Սիրսկին նշել է երկրի առանցքային նպատակը](https://auroranews.am/storage/img/base_image/2024-07-24/66a1226e0bd0b.webp)
Ուկրաինան ծրագիր ունի. Սիրսկին նշել է երկրի առանցքային նպատակը
![Ուկրաինան ծրագիր ունի. Սիրսկին նշել է երկրի առանցքային նպատակը](https://auroranews.am/storage/img/base_image/2024-07-24/66a1226e0bd0b.webp)
Ուկրաինան Ռուսաստանի կողմից օկուպացված Ղրիմը վերադարձնելու ծրագիր ունի։ Թերակղզին դեօկուպացնելու մտադրությունը միանգամայն իրատեսական է, Guardian-ին տված հարցազրույցում հայտարարել է Ուկրաինայի զինված ուժերի գլխավոր հրամանատար Ալեքսանդր Սիրսկին: Նա հավելել է, որ այդ ծրագիրը ռազմական մեծ գաղտնիք է։
«Ղրիմը վերադարձնելն իրատեսական է։ Մենք ամեն ինչ կանենք, որպեսզի հասնենք 1991 թվականի միջազգայնորեն ճանաչված սահմաններին։ Մենք պետք է հաղթանակ տանենք, որպեսզի ազատ արձակենք օկուպացված տարածքներում գտնվող մեր քաղաքացիներին, որոնք տառապում են», - ասել է Սիրսկին։
Ուկրաինայի զինված ուժերի գլխավոր հրամանատարը նաև նշել է, որ Ուկրաինայի առանցքային նպատակը գրավյալ թերակղզին ՌԴ-ին կապող Կերչի կամրջի ոչնչացումն է: Միևնույն ժամանակ, Սիրսկին հրաժարվեց ասել, թե երբ դա կարող է տեղի ունենալ:
«Ռուսները ստիպված են եղել ամբողջովին դուրս գալ Ղրիմի Սևաստոպոլի նավահանգստից Ուկրաինական մի շարք հարձակումներից հետո, քանի որ Ուկրաինայի զինված ուժերի անօդաչու թռչող սարքերից և հրթիռային հարձակումներից հետո այնտեղ ոչնչացվել են ռադարային և հրթիռային կայանքներ», - պարզաբանել է Սիրսկին: