Կներեք, սամալյոտի մարշրուտկա չէր․ Ավինյանը՝ «Fly Arna»–ի փակվելու մասին

Ազգային ավիափոխադրող «Fly Arna»–ին վերաբերող այն ռեֆորմները, որ պետք է իրականացվեին ժամանակին, չեն իրականացվել։ Այս մասին այսօր ասուլիսի ժամանակ ասաց Երևանի քաղաքապետ Տիգրան Ավինյանը` պատասխանելով լրագրողի հարցին, թե արդյոք իրեն մեղավոր զգում է «Fly Arna»–ի ձախողման և մսխված տասնյակ միլիոնավոր դոլարների համար։

«Ով օգտվել է ազգային ավիափոխադրողի ծառայություններից, շատ լավ հասկանում է, թե ինչ որակի մասին է խոսքը։ Կներեք, սամալյոտի մարշրուտկա չէր, վերջապես կարող էին պատվով քո ազգային ավիափոխադրողով X կետից Y կետ դռչել: Ես մի բանում եմ ափսոսում «Fly Arna»–ի պատմության մեջ, որ այն ռեֆորմները, որ պետք է իրականացվեին ժամանակին, չեն իրականացվել»,– ասաց Ավինյանը։

Հիշեցնենք` «Fly Arna»-ն հիմնադրվել է 2021 թվականին «Air Arabia» ավիաընկերության և Հայաստան պետական հետաքրքրությունների ֆոնդի` ԱՆԻՖ–ի կողմից՝ որպես հիմնադրամի ամենամեծ ներդրումային նախագիծ (Տիգրան Ավինյանը 2019-2022 թվականներին եղել է ԱՆԻՖ–ի խորհրդի նախագահը)։ Ավիաընկերությունը 2024 թվականի հունվարին դադարեցրեց գործունեությունը, իսկ 2024 թ. մայիսին ՀՀ կառավարությունը որոշեց լուծարելու ԱՆԻՖ–ը։

2022–2023 թթ. կոռուպցիայի կանխարգելման հանձնաժողովը և ՀՀ պետական վերահսկողական ծառայությունը բացահայտեցին հիմնադրամում չարաշահումների և հափշտակությունների դեպքեր: Քննչական կոմիտեն այժմ ուսումնասիրում է այդ գործերը։

Արժույթի միջազգային հիմնադրամը 2023 թ–ին ԱՆԻՖ–ում հայտնաբերեց նաև հաշվետվությունների և կառավարման հետ կապված խնդիրներ, ինչը հանգեցրեց դրա գործունեության սահմանափակմանը ՀՀ կառավարության կողմից: