Շոլցը մերժել է Ուկրաինայի վրա արձակվող հրթիռները խոցելու՝ Զելենսկու խնդրանքը

Գերմանիայի կանցլեր Օլաֆ Շոլցը մերժել է Ուկրաինայի նախագահ Վլադիմիր Զելենսկու՝ արևմտյան դաշնակիցներին ուղղված խնդրանքը՝ իրենց սպառազինությամբ Ուկրաինայի վրա արձակվող ռուսական հրթիռներն ու անօդաչու թռչող սարքերը խոցելու վերաբերյալ։

Եվրոպական քաղաքական համայնքի գագաթնաժողովից հետո կայացած ասուլիսում, որտեղ հրավիրված էր նաև Վլադիմիր Զելենսկին, Գերմանիայի կառավարության ղեկավար Շոլցը ևս մեկ անգամ մերժել է Ուկրաինայի ղեկավարի խնդրանքը՝ վերացնել արևմտյան զենքի կիրառման սահմանափակումները Ռուսաստանի տարածքի վրա։

Պատասխանելով լրագրողների այն հարցին, թե արդյոք ՆԱՏՕ-ի մյուս երկրները կիսում են այս մոտեցումը, Օլաֆ Շոլցն ընդգծել է. «Ես այնպիսի կոնսենսուս եմ նկատում, որ նման քայլեր չեն կարող քննարկվել։ ԱՄՆ-ն նույնպես շատ հստակ դիրքորոշում է ընդունում այս հարցում»։