Երևանի քաղաքապետի խորհրդական Կամո Արեյանն անդրադարձել է ջրահեռացման խնդրին։ Նրա խոսքով՝ Երևանի ջրերի հեղեղատար և անձրևընդունիչ համակարգը թերի է. «Այսօր գործող 167 կմ-ն է: Հանձնված է «Վեոլիա ջուր» ընկերությանը՝ վարձակալության պայմանագրով շահագործման»,- ասել է նա։

Արեյանի խոսքով՝ կատարվել է ուսումնասիրություն, ավարտվել է գույքագրումը, և արդյունքը պետք է ներկայացվի կառավարությանն ու դոնոր աղբյուրներին, որպեսզի կառուցվի նոր հեղեղատար համակարգ: Նաև պարզվել է, որ կան թաղամասեր, որոնք չունեն հեղեղատար համակարգ, ի սկզբանե կառուցված չի եղել․

«Ինչքան քաղաքը բարեկարգվում և կառուցապատվում է, այնքան մեծանում է մակերևութային ջրերի ծավալը, որովհետև գրունտը քաշվում է հողի մեջ: Նոր կառուցապատումները, ասֆալտապատումը, սալիկապատումը բերում են մակերևութային ջրերի ծավալի ավելացման, ինչն էլ հանգեցնելու է նոր հեղեղատար համակարգի կառուցման անհրաժեշտության: Օրինակ, 4 խաչմերուկ է հիմա քանդվում Տերյան փողոցի երկարությամբ՝ Ագրարային համալսարանի մոտից մինչև Թումանյան փողոց, վերևի բնակելի համալիրի մակերևութային ջրերը անձրևընդունիչ ցանց ընդունելու համար»,- ասել է նա:

Ինչ վերաբերում է վերջին հեղեղումներին՝ Արեյանը մանրամասնել է, որ տեղումները նորմայից բարձր էին, անձրևընդունիչ համակարգը չէր կարող այդքան ծավալն ընդուներ. «Մենք ունենք շատ փոքր ծավալի անջատ հեղեղատար համակարգ, մեր համակարգը կիսանջատ է․ այսինքն, այն միացված է նաև կոյուղատար համակարգին, և մեծ ծավալի անձրևների դեպքում բերում է ծանրաբեռնվածության, ինչը կարող է փողոցներում հանգեցնել մակերևութային ջրերի ծավալի աճի: Այնպես որ, այս համակարգը լուրջ ներդրման և վերակառուցման կարիք ունի»։

Երևանի քաղաքապետ Տիգրան Ավինյանն էլ ասել է, որ այդ ոլորտում քաղաքապետարանը տարիներ ի վեր խոշոր ծրագրեր չի իրականացրել, աշխատանքը սկսվել է 2022-23թթ.-ից, և սկսվել է այն թաղամասերից, որտեղ առհասարակ համակարգ չկա։