Ֆրանսիան Լիբանանին աջակցություն է խոստացել Իսրայելի հետ սահմանին. Breaking Defense

Ֆրանսիան անվտանգության առաքելության շրջանակներում կաջակցի լիբանանյան զինված ուժերին, եթե Բեյրութը որոշի դրանք տեղակայել Իսրայելի հետ սահմանին, հայտնում է Breaking Defense-ը՝ վկայակոչելով ֆրանսիացի անանուն պաշտոնյային։

«Մենք պետք է պատրաստ լինենք նպաստելու Լիբանանի զինված ուժերի մեծացմանը հարավային Լիբանանում, որպեսզի օգնենք ապահովել Լիբանանի ժողովրդի անվտանգությունը և լիբանանյան պետության ինքնիշխանությունը», - մեջբերում է հրատարակությունը պաշտոնյայի խոսքերը։

Պաշտոնյայի խոսքով՝ Ֆրանսիան քննարկում է Լիբանանին օգնելու տարբեր նախաձեռնություններ: Պաշտոնյան ընդգծել է, որ Բեյրութը և այլ մայրաքաղաքներ քննարկում են երկրի հարավում անվտանգության ապահովման հնարավոր միջոցները։

Հրատարակությունը, սակայն, նշում է, որ պաշտոնյան այս հայտարարությունն արել է Իսրայելի և Լիբանանի միջև տարաձայնությունների սրումից առաջ։