Հայտնի է՝ ինչու է Իրանը միջուկային օբյեկտներում միջոցառումներ ձեռնարկել
Թեհրանը Նաթանզում եւ Ֆորդոյում գտնվող իր միջուկային օբյեկտներում մի շարք միջոցառումներ է ձեռնարկել՝ ի պատասխան հակաիրանական բանաձեւի, որը եվրակառույցը ներկայացրել է Ատոմային Էներգիայի միջազգային գործակալության (ՄԱԳԱՏԷ) կառավարիչների խորհրդին, հաղորդում է Mehr գործակալությունը:
Ավելի վաղ «Ֆրանս Պրես» գործակալությունը, հղում անելով դիվանագիտական աղբյուրներին, հայտնել էր, որ Ֆրանսիան, Գերմանիան և Մեծ Բրիտանիան (Եվրոմիությունը) պաշտոնապես ՄԱԳԱՏԷ-ի Կառավարիչների խորհրդին բանաձև են ներկայացրել՝ դատապարտելով Իրանի «միջուկային էսկալացիան»: «Ռոյթերս» գործակալության փոխանցմամբ, բանաձևի նախագծում «Եվրոմիություն» կոչ է անում Իրանին համագործակցել ՄԱԳԱՏԷ-ի հետ և բացատրել ուրանի հետքերի առկայությունը չհայտարարագրված իրանական օբյեկտներում:
Վիեննայում միջազգային կազմակերպություններում ՌԴ ներկայացուցիչ Միխայիլ Ուլյանովը հայտնել է, որ ՄԱԳԱՏԷ-ի Կառավարիչների խորհուրդը կողմ է քվեարկել այդ բանաձևին:
«Ըստ լուրերի, ի պատասխան եվրոպական երեք երկրների (Ֆրանսիա, Գերմանիա և Անգլիա) թշնամական քայլերի, որոնք վերաբերում են Իրանի Իսլամական Հանրապետության դեմ ՄԱԳԱՏԷ - ի Կառավարիչների խորհրդի բանաձևի ընդունմանը, Իրանում մի շարք միջոցառումներ են ձեռնարկվել Նաթանզում և Ֆորդոյում», - ասվում է գործակալության հաղորդագրության մեջ:
Երկու օր առաջ Իրանի ԱԳ նախարարի պաշտոնակատար Ալի Բաղերի Քյանին ՌԻԱ Նովոստիին տված հարցազրույցում հայտարարել էր, որ Իրանի գործունեությունը ատոմային Էներգիայի միջազգային գործակալության (ՄԱԳԱՏԷ) վերահսկողության տակ է, այն երկրները, որոնք Իրանին մեղադրում են այն բանում, որ իր միջուկային ծրագիրը մտահոգիչ է, ցանկանում են ՄԱԳԱՏԷ-ն վերածել Թեհրանի հետ քաղաքական հաշիվներ մաքրելու վայրի, իրենց գործողություններով կասկածի տակ են դնում գործակալության հեղինակությունը:
