ԱՄՆ Տեխաս նահանգում բացվել է 155 մմ տրամաչափի հրետանային արկերի բաղադրիչների արտադրության նոր գործարան։ Այս մասին լրագրողների համար հատուկ առցանց ճեպազրույցում հայտարարել է Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին։

Նրա խոսքով, նոր գործարանի բացումը «էապես կբարձրացնի հրետանային զինամթերքի արտադրության հնարավորությունները», ինչը «հսկայական նշանակություն» ունի Ուկրաինայի համար։

Ավելի վաղ ԱՄՆ բանակի շտաբի պետ, գեներալ Ռենդի Ջորջը Սենատի հատկացումների հանձնաժողովում լսումների ժամանակ ասել էր, որ ԱՄՆ-ն ակնկալում է եռապատկել 155 մմ տրամաչափի հրետանային արկերի արտադրությունը մինչև 2026 թվականի սկիզբը՝ մինչև 100 հազար միավոր։