4 ձերբակալված՝ ՀՀ-ում և Ուկրաինայում կիբերհանցագործությունների դեմ խոշոր գործողության արդյունքում

Չորս մարդ Է ձերբակալվել Ուկրաինայում և Հայաստանում միջազգային կիբերհանցագործությունների դեմ ուղղված խոշոր գործողության արդյունքում, այս մասին հայտնում է Եվրոպոլը։

Գերատեսչության համաձայն՝ հարձակման են ենթարկվել ավելի քան 100 ինտերնետային սերվերներ, ինչի հետևանքով հազարավոր մարդիկ են տուժել։ Մայիսի 27-29-ն իրականացված հատուկ գործողությունները Եվրամիության իրավապահ գերատեսչությունն անվանել է «բոտնետների դեմ երբևէ ամենախոշոր գործողությունը պատմության մեջ, որոնք կարևոր դեր են խաղում շորթող-վիրուսների տարածման գործում»։

Բրյուսելի հաղորդագրության համաձայն՝ ձերբակալություններից մեկը Հայաստանում է իրականացվել, մյուս երեքը՝ Ուկրաինայում։ Կասկածյալների ինքնության, ազգային պատկանելության մասին չի հաղորդվում։

Ըստ քննիչների՝ գլխավոր կասկածյալներից մեկը կրիպտոարժույթով վաստակել է առնվազն 69 միլիոն եվրո՝ վարձակալության հանձնելով հանցավոր ենթակառուցվածքի կայքեր՝ շորթող ծրագրերի համար։